Le Retour du maçon

Adiu, Paris, la granda vila ;
I parte par le Lemosin ;
Vòle reveire ma familha,
Dire un bonjorn a mos vesins ;
N’ai pas fach mauvasa campanha,
Mon pòrta-moneda es farrat,
Nos ditz que n’i a de las chastanhas,
Que los bladius son bien granats.

Jana m’a escrit que la Liaunarda
A desjà trovat daus galants ;
Ma filha es genta e plan galharda,
Nos la marideran ujan ;
Crese que si ren la desranja
La serà per Andrisson ;
Sa sanha tucha nòstra granja ;
Quò es pas mai malin qu’un moton.

Tot va questa annada a marvelha ;
La vacha bruna a fach vedel ;
O n’i a beleu pas sa parelha
Dins le país per lo laite ;
Sei ben content, nòstre mainatge
Ne sofrirá pas queste ivern,
N’am le pus gròs pòrc dau vilatge,
Par far la sopa de chauls le ser.

Nadau s’apròcha, la jalada
Me ditz de quitar le martel ;
Chas nos mingerai la borçada,
Quò me reschaufara le bec ;
A-de-suita, i fau ma mala
Par prener le chamin de fer ;
Tres ne’n quitam la capitala ;
Mon nebot, me, le vieulh Coderc.

Gracia au bon Diu, de mon salaire,
Pòde aquesir un pasturau
E quauque tròç de chanibiera,
Le talhadis dau pair Marçau.
I’n’aurai pas un fòrt domene,
Mas qu’es le fruch de mon labor.
Mas aura, la chausa es certena,
Pause le sac, sei laborador.

François Mettoux, Le retour du maçon

Localisation